«Qonbolta» serialining chiqish sanasi e'lon qilindi va yangi treyleri namoyish etildi

Prime Video «Qonbolta» (Bloodaxe) serialining yangi treylerini taqdim etdi va uning chiqish sanasini ma'lum qildi. Birinchi faslning barcha sakkizta qismi 2027-yil 20-yanvarda platformada namoyish etiladi.

Tizer Nyu-York Comic Con tadbiridagi panelda ko'rsatildi. Unda serial yaratuvchilari Michael Hirst va Horatio Hirst, shuningdek aktyorlar Xavier Molyneux, Jessica Madsen va Levi Miller ishtirok etdi.

Birinchi fasl tarixdagi mashhur norveg bosqinchilaridan biri Erik Bloodaxe rolidagi Xavier Molyneux va uning rafiqasi Gunnhild rolidagi Jessica Madsen haqida hikoya qiladi. Ular Norvegiya taxti uchun kurash olib borar ekan, mamlakat raqobat, sadoqat va xiyonatlar girdobiga tushadi. Voqealar fonida boshqa Skandinaviya qirollari va hatto ingliz qiroli ham mojaro ichiga tortiladi.

Serialda, shuningdek, Karlis Arnolds Avots, Rod Hallett, Alina Tomnikov, Sisse Marie, Rune Temte va Jesper Christensen ham rol ijro etgan. Voqealar X asrda, Michael Hirst'ning avvalgi teleloyihalari oralig'idagi davrda kechadi. «Qonbolta» uning «Vikinglar» (Vikings) seriali bilan tarixiy jihatdan bog'liq: bu loyiha 2013-yildan 2021-yilgacha efirda bo'lgan, uning davomchisi «Vikinglar: Valxalla» (Vikings: Valhalla) esa Netflix'da 2022-yildan 2024-yilgacha uch fasl davom etgan.

«Qonbolta» ssenariysi Michael Hirst va Horatio Hirst tomonidan yozilgan, ular ijrochi prodyuser sifatida ham ishlagan. Ijrochi prodyuserlar qatoriga O'Sullivan Productions nomidan Morgan O'Sullivan, Toluca Pictures nomidan Steve Stark, shuningdek Arturo Interian, John Weber va Sheila Hockin kiradi. Serial MGM Television tomonidan ishlab chiqarilgan. Loyiha ikkinchi faslga ham uzaytirilgan, u hozir Irlandiyada suratga olinmoqda.

Treyler

Manba: Variety