«Betmen 2» ishlab chiqarishi Matt Reeves sabab vaqtincha to'xtatildi

Warner Bros. va DC Studios «Betmen 2» (The Batman: Part II) ishlab chiqarishini vaqtincha to'xtatdi. Kompaniya vakili bayonotida aytilishicha, rejissyor Matt Reeves hozir oilaviy masala bilan shug'ullanmoqda. Studiyalar unga to'liq ko'mak bildirgan va loyiha ustidagi ishlar tez orada davom etishiga umid qilayotganini ma'lum qilgan.

Davomiy filmda Robert Pattinson yana Betmen roliga qaytadi. Loyiha avval ham bir necha bor kechiktirilgan: dastlab film 2026-yil 2-oktyabrda chiqishi rejalashtirilgan, keyin sana 2027-yil 1-oktyabrga surilgan. Iyul oyida esa Warner Bros. premyerani 2028-yil fevraliga ko'chirgan. Matt Reeves suratga olgan birinchi «Betmen» (The Batman) 2022-yil mart oyida ekranlarga chiqqan edi.

Aktyorlar tarkibida Pattinsondan tashqari Scarlett Johansson, Colin Farrell, Sebastian Stan, Andy Serkis va Jeffrey Wright ham bor. Avvalgi kechikishdan keyin DC Studios rahbari James Gunn Threads'da yirik franshizalar davomiy filmlari orasida uzoq tanaffus bo'lishi odatiy hol ekanini yozgandi.

Yaqinda Collider'ga bergan intervyusida Robert Pattinson «Betmen 2» birinchi filmga nisbatan butunlay boshqacha yondashuvga ega bo'lishini aytdi. Uning so'zlariga ko'ra, yangi qism avvalgisidan keskin farq qiladi, ammo birinchi film kayfiyatining ayrim unsurlarini saqlab qoladi. Aktyor filmni juda katta ko'lamli loyiha deb ta'riflagan.

Franshizaning avvalgi filmlarini FreeKino'da o'zbek tilida ko'rishingiz mumkin: «Betmen».

Manba: Variety