«Nigli» Prime Video reytingida 1-o'ringa chiqdi
«Nigli» (Neagley) 16-sentabr kuni «Richer» (Reacher) 4-fasli finali bilan bir vaqtda Prime Video'da start oldi. Serial qisqa vaqt ichida platforma reytingida 1-o'ringa ko'tarildi, «Richer» esa 2-o'ringa tushdi.
Yangi serial markazida Maria Sten ijro etayotgan Frances Neagley turadi. «Richer» muxlislari uni Jack Reacher'ning eng ishonchli hamkori va xususiy tergovchi sifatida yaxshi taniydi. Bu safar qahramon o'z ishini mustaqil olib boradi: unga juda yaqin fojiadan keyin Neagley nafaqat bugungi tahdidlar, balki o'tmishidagi og'riqli xotiralar bilan ham yuzlashadi.
Voqealar Chikagoda boshlanadi: Tommy Crane ismli erkak poyezd tomon yalang'och holda yurib boradi. Rasmiylar hodisani o'z joniga qasd qilish deb baholaydi, ammo Neagley bunga ishonmaydi. Tommy uning bolalikdagi do'sti bo'lib chiqadi. U marhumning buyumlarini ko'zdan kechirarkan, o'limidan oldingi so'nggi aloqa shubhali Echo Canyon Farm bilan bog'liq bo'lganini aniqlaydi.
Tergovni yolg'iz olib borishning imkoni bo'lmagach, Neagley o'z jamoasini tuzadi. Unga Chikago politsiyasi xodimi Hudson Riley, ko'cha informatori Keno va texnik mutaxassis Renee Birdwhistle qo'shiladi. Shu bilan birga, Neagley mahalliy idoralarda shubha uyg'otmasdan ish yuritishi va uning ortidan yuborilgan noma'lum qotillardan qutulishi kerak bo'ladi.
«Nigli» Lee Child'ning alohida romani asosida suratga olinmagan, biroq qahramon haqidagi tafsilotlar yozuvchining «Richer» kitoblar turkumida tilga olingan. Serial Neagley'ning AQSh armiyasidagi master-serjant o'tmishi, jangovar tayyorgarligi va tergovchilik mahoratini yanada chuqurroq ko'rsatadi. Hikoyada kultlar, ongga ta'sir qiluvchi moddalar va ulardan foyda ko'rmoqchi bo'lgan biznesmen bilan bog'liq fitna ham bor.
Yana bir muhim chiziq Neagley'ning hafefobiya, ya'ni birovga tegish yoki birovning teginishidan qo'rqish holati bilan bog'liq. Bu xususiyat avval Lee Child'ning «Tungi maktab» (Night School) kitobida tilga olingan edi. Serialda aynan shu holat qahramonning odamlar bilan ishlash usuliga, tergov jarayoniga va bolalik xotiralari bilan bog'liq ichki kurashiga ta'sir qiladi.
Treyler
Manba: Collider
