«Qazuvchi» prokatni sust boshladi, «Haqiqat» juma kuni birinchi o'ringa chiqdi
Warner Bros.ning «Qazuvchi» (Digger) filmi Shimoliy Amerikadagi 3321 ta kinoteatrda juma kuni 3,4 million dollar ishlab topdi. Salbiy taqrizlar va ikki xil fikr uyg'otgan tomoshabin reaksiyasidan keyin filmning ilk dam olish kunlari ichki bozordagi tushumi 7,5 million dollar atrofida bo'lishi kutilmoqda.
Filmni «Oskar» sovrindori Alejandro Gonzalez Inarritu suratga olgan. Kartinada Tom Cruise ekologik falokatga sabab bo'ladigan kompaniyaga boshchilik qiluvchi qudratli neft magnati rolini ijro etadi. Manbaga ko'ra, loyiha dastlab 125 million dollarga tasdiqlangan, ammo suratga olish jarayoni cho'zilgach, byudjet 160-180 million dollargacha oshgan.
Tom Cruise so'nggi yillarda «Bajarib bo'lmas topshiriq» (Mission: Impossible) turkumi va «Top Gan: Meverik» (Top Gun: Maverick) kabi yirik filmlar bilan kassada muvaffaqiyat qozonganiga qaramay, «Qazuvchi» Warner Bros. uchun bu yilgi omadsiz relizlar qatoriga qo'shilishi mumkin. Studiya avvalroq Maggie Gyllenhaal ishlagan «Kelin» (The Bride!) hamda DC asosidagi «Superqiz» (Supergirl) bilan ham kutilgan natijaga erisha olmadi.
Juma kungi kassada birinchi o'rinni Amazon MGM'ning «Haqiqat» (Verity) psixologik trilleri egalladi. Film 3510 ta kinoteatrdan 15,1 million dollar yig'di va dam olish kunlari yakuniga qadar 33,6 million dollarga chiqishi kutilmoqda. Colleen Hoover'ning shu nomli bestselleri asosida ishlangan filmda Anne Hathaway mashhur yozuvchi Verity Crawford rolini o'ynaydi. Qahramon avtohalokatda og'ir jarohat olgach, uning eri rolidagi Josh Hartnett qolgan kitoblarni tugatish uchun qiynalayotgan yozuvchini, ya'ni Dakota Johnson qahramonini yollaydi. Filmga Michael Showalter rejissyorlik qilgan.
Ikkinchi o'rinda Zach Cregger suratga olgan zombi dahshat filmi «Yovuzlik maskani» (Resident Evil) qayd etildi. Sony kartinasi juma kuni 3,62 million dollar yig'di. Austin Abrams unda Raccoon City General Hospital'ga yetkazib berish vaqtida zombi epidemiyasiga duch keladigan tibbiy kuryerni gavdalantiradi. Film yakshanbagacha yana 12 million dollar qo'shib, ichki bozordagi umumiy tushumini 124,395 million dollarga yetkazishi kutilmoqda.
To'rtinchi pog'onani Paramount Pictures'ning «Yirtqich yuragi» (The Heart of the Beast) egalladi: juma kungi tushum 3,15 million dollar, umumiy natija esa 38,39 million dollar. Brad Pitt ishtirok etgan sarguzasht filmiga David Ayer rejissyorlik qilgan. Beshinchi o'rinda esa A24'ning «Prajm-taym» (Primetime) kartinasi joy oldi. U juma kuni 2,49 million dollar yig'di va yakshanbagacha 7,5 million dollar qo'shishi kutilmoqda. Robert Pattinson bosh rolni ijro etgan drama hozirgacha ichki bozorda 28,58 million dollar topladi.
Treyler
«Qazuvchi»ni FreeKino'da o'zbek tilida tomosha qilishingiz mumkin: «Qazuvchi».
Manba: Variety
