«Do'stona qo'shni O'rgimchak-odam» 2-fasli 2027-yil yanvarda chiqadi

Marvel Television and Animation panelida «Do'stona qo'shni O'rgimchak-odam» (Your Friendly Neighborhood Spider-Man) 2-faslidan ilk ko'rinish namoyish etildi. Shu bilan birga, serialning yangi fasli 2027-yil 13-yanvarda namoyish etilishi rasman tasdiqlandi. Taqdim etilgan materialda ayniqsa Venom obraziga urg'u berilgan.

Jeff Trammell yaratgan animatsion serial muqobil olamdagi Peter Parkerga bag'ishlangan. Bu talqinda unga Tony Stark emas, balki Norman Osborn murabbiylik qiladi. 2-faslda voqea doirasi kengayadi: Rhino, Lizard va Venom kabi tanish yovuz qahramonlar, shuningdek Ghost Spider sifatida Gwen Stacy ham hikoyaga qo'shiladi.

1-fasl Peterning bu muqobil olamdagi hayotini shakllantirishga xizmat qilgan bo'lsa, 2-fasl tanish unsurlarni faolroq ishga soladi. Avvalgi fasl yakunida Peterning otasi Richard (Josh Keaton) tirik ekani va qamoqda saqlanayotgani ochiqlangandi. Norman'ning Project Manhattan ustidagi xavfli ishlari esa Peterning ustoziga bo'lgan ishonchini susaytirgan va u Harry (Zeno Robinson) bilan o'z kompaniyasi ustida ishlay boshlagandi.

Yangi faslda Peterning atrofidagi asosiy qahramonlar ham qaytadi. Ular orasida Grace Song ijro etgan Nico Minoru, Eugene Byrd ijro etgan Lonnie Lincoln, Kari Wahlgren ijro etgan Aunt May, Cathy Ang ijro etgan Pearl Pangan va Anjali Kunapaneni ijro etgan Jeanne Foucalt bor. Shuningdek, Charlie Cox ham Daredevil roliga qaytadi: finaldagi ishoraga ko'ra, u Oscorp faoliyatini tekshirmoqda.

Venomning kirib kelishi bilan Eddie Brock (Keaton) ham voqealarda muhim o'rin tutadi. Manbaga ko'ra, bu safar u Peter bilan birga Daily Bugle nashrida muxbir bo'lib ishlaydi va shu orqali ular o'rtasida o'ziga xos raqobat shakllanadi.

Treyler

Manba: Collider