«Iks-odamlar '97» 3-fasli tasdiqlandi va ilk tizer namoyish etildi
Marvelning «Iks-odamlar '97» (X-Men '97) animatsion seriali Disney+da 3-faslga uzaytirildi. New York Comic Con tadbirida Marvel televideniyesi, animatsiyasi, komikslari va franshizasi rahbari Brad Winderbaum yangi qismlardan ilk lavhani namoyish qildi.
Ko'rsatilgan lavha devorga yozilgan «Iks-odamlar qayerda?» degan graffiti bilan boshlanadi. Shaharda tartibsizlik kuchaygani, politsiya hududni to'sib qo'ygani va chegara yopilgani aytiladi. Shu sabab mutantlar Professor X maktabiga bora olmayapti va ularda tranzit xati bo'lmasa, turar joy ham topilmaydi. Bir yosh mutant yashirincha o'tishga urinadi, ammo xavf sifatida baholanadi. Uni qo'lga olish arafasida bir guruh mutantlar qutqarib qoladi. Qiz ulardan Iks-odamlarmi, deb so'raydi, ular esa o'zlarini Birodarlik deb tanishtiradi.
Lavhada Storm va Professor X ham birga mashinada ketayotgani, ular AQSh prezidenti bilan bog'liq mojaro haqida gaplashayotgani ko'rsatilgan. Keyin ular Gambit va Rogue to'yiga yetib keladi. Marosim mehmonlari orasida Deadpool va She-Hulk ham bor.
«Iks-odamlar '97»ning 2-fasli finali 12-avgust kuni efirga uzatilgan edi. Birinchi fasl 2024 yilda chiqqan va 90-yillardagi mashhur «Iks-odamlar: Animatsion serial» (X-Men: The Animated Series) voqealarini davom ettirgan. Disney+ loyihasi 1992-1997 yillarda Fox Kids'da namoyish etilgan asl serialni qayta tikladi.
2-faslda Iks-odamlar vaqt bo'ylab tarqalib ketadi va ularning yangi raqibi vaqt bo'ylab sayohat qiluvchi Apocalypse bo'ladi. Qadimgi Misrda kechadigan muhim voqealarda Charles Xavier va uning jamoasi Apocalypse'ning Magnetoni o'ldirishiga to'sqinlik qila olmaydi. Faslda hukumat qo'llovidagi X-Factor guruhi ham paydo bo'ladi, uning tarkibida Magnetoning qizi Polaris bor. Shuningdek, Cyclops va Jean Grey'ning kelajakdan qaytgan o'g'li Cable boshchiligidagi X-Force ham ko'rsatiladi.
1-faslda Gambitning o'limi ko'rsatilgan bo'lsa, 2-faslda u Apocalypse otlilaridan biri sifatida qaytadi. Avvaliga u Iks-odamlarga qarshi turadi, biroq Rogue Celestial kuchidan foydalanib uni qutqaradi. Shu jarayonda Nightcrawler Rogue o'rniga o'zini qurbon qiladi. Finalda yana Mystique X-Factor yetakchisi Valerie Cooper'ni o'ldirib, uning qiyofasini egallagani va Mystique'ning mutant bo'lmagan o'g'li Graydon Creed AQSh prezidenti etib saylangani ochiqlangan.
Treyler
Manba: Variety
