«Qutqaruvchilar» rebootining chiqish sanasi rasman e'lon qilindi

Fox «Qutqaruvchilar» (Baywatch) rebootining namoyish sanasini rasman belgiladi. Yangi serial 6-yanvar kuni soat 21:00 da Fox telekanalida efirga chiqadi. Loyiha 2026-2027 telemavsumi uchun tasdiqlangan va 12 qismga buyurtma berilgan edi.

Yangi talqinning bosh rolini Stephen Amell ijro etadi. U Instagram'da yangi aktyorlar tarkibi aks etgan post bilan bo'lishdi. Tarkibdan Shay Mitchell, Brooks Nader, Hassie Harrison, Livvy Dunne, Noah Beck, David Chokachi va Thaddeus LaGrone ham o'rin olgan.

Syujet markazida Hobie Buchannon turadi. Stephen Amell gavdalantirayotgan qahramon Mitch (David Hasselhoff) va Gayle Buchannon (Wendie Malick)ning o'g'li bo'lib, otasining izidan borib «Qutqaruvchilar» kapitaniga aylanadi. Biroq uning hayoti qizi Charlie Vale (Jessica Belkin) eshigi oldida paydo bo'lgach o'zgaradi: u Buchannonlar oilasi an'anasini davom ettirishni istaydi.

Yangi serialda Hassie Harrison Nat rolini, Shay Mitchell Trina rolini, Thaddeus LaGrone Brad rolini, Noah Beck Luke rolini, Brooks Nader esa Selene rolini o'ynaydi. Livvy Dunne Grace obrazida takrorlanuvchi rolda suratga tushadi va bu uning aktyorlikdagi debyuti bo'ladi. David Chokachi esa asl serialdagi Cody Madison roliga qaytadi.

Asl «Qutqaruvchilar» 1989 yildan 2001 yilgacha 11 fasl davom etgan. Dastlab voqealar Kaliforniyaning Los Angeles okrugi plyajlaridagi qutqaruvchilar haqida hikoya qilgan, keyinroq serial Hawaii'ga ko'chgan. 1989 yildan 1999 yilgacha loyiha asl nom ostida efirga uzatilgan, 1999 yildan 2001 yilgacha esa «Qutqaruvchilar: Gavayi» (Baywatch: Hawaii) nomi bilan davom etgan. Keyinchalik undan «Qutqaruvchilar tunlari» (Baywatch Nights) spin-offi va 2017 yilda Dwayne Johnson hamda Zac Efron ishtirokidagi to'liq metrajli film ham yaratilgan.

Treyler

Manba: Screen Rant