«Persi Jekson va olimpiyachilar» 3-fasli treyleri va premyera sanasi e'lon qilindi

«Persi Jekson va olimpiyachilar» (Percy Jackson and the Olympians) 3-faslining ilk to'liq treyleri e'lon qilindi. Unda yunon xudolari bilan titanlar o'rtasidagi urush yaqinlashayotgani ko'rsatiladi. Yangi fasl 20-noyabr kuni Disney+da premyera qilinadi.

Treylerga ko'ra, dunyoni bu halokatli to'qnashuvdan saqlab qolish uchun Persi rolidagi Walker Scobell ko'makka muhtoj bo'ladi. Buning uchun u Zevsning qizi Taliya bilan kuchlarini birlashtirishiga to'g'ri keladi. Taliya obrazini Tamara Smart ijro etgan. Shu bilan birga, Persi yana bir necha yarimxudolarni ham qutqarishi kerak bo'ladi.

Videoda Levi Chrisopulos va Olive Abercrombie ijro etgan Hades farzandlari Niko va Byanka di Angelo ilk bor ko'rsatilgan. Aynan shu voqealar Rick Riordanning bestseller turkumidagi uchinchi kitob — «Titan la'nati» (The Titan's Curse) asosidagi 3-faslning asosiy sarguzashtini boshlab beradi. Bu qutqaruv paytida Annabet rolidagi Leah Sava Jeffries Lyuk kuchlari tomonidan asir olinadi va Kaliforniyadagi dushman qarorgohida titan Atlas huzuriga olib ketiladi.

Treylerda Kate McKinnon Afrodita, Ming-Na Wen esa Gera sifatida ilk bor ko'rinadi. Shuningdek, Lin-Manuel Miranda Germes, Courtney B. Vance Zevs va Adam Copeland Ares obrazlarida yana namoyon bo'ladi. Yangi faslga Jennifer Beals Demetra, Hubert Smielecki esa Apollon sifatida qo'shilgan.

Tomoshabinlarga Annabetni qutqarish missiyasida uchraydigan maxluqlardan biri — xudolar chiqindixonasidagi ulkan bronza avtomat Talos ham ko'rsatilgan. Yangi aktyorlar tarkibidan Holt McCallany Atlas, David Costabile Dr. Thorn, Jesse L. Martin esa Annabetning oddiy inson otasi Frederick Chase rolini ijro etadi. Shuningdek, Dafne Keen Artemis, Saara Chaudry esa Zoe Nightshade obrazlarida suratga tushgan.

Treyler

Manba: Deadline