«Doktor Kim» 18 yildan keyin Georgia Tennantni franchayzga qaytardi

«Doktor Kim» (Doctor Who) franchayzi 18 yildan keyin tanish qiyofani qaytarmoqda: Georgia Tennant Big Finish Productions tayyorlayotgan yangi audio drama «Nol sovuqlik»da (Zero Chill) ishtirok etadi. Aktrisa muxlislar esida Doktorning qizi Jenny roli bilan qolgan edi. Yangi loyiha 2027 yil iyunida chiqishi rejalashtirilgan.

Georgia Tennant Jenny obrazini uchta hikoyada yana gavdalantiradi: «Dam olish» (Relax), «Qorong'ida raqs» (Dancing in the Dark) va «Tez va g'azabli» (Fast & Fuming). Boy galaktik jinoyatchi Jexabel Glycega Anna Lundberg ovoz beradi. Noah obrazini esa Sean Biggerstaff ijro etadi.

Audio drama tavsifiga ko'ra, Jenny va Noah yana bir bor makon va zamonni qutqarib bo'lganidan keyin tanaffus qilishni istaydi. Biroq koinotning boshqa rejasi bor: Jennyning eski raqibi Jexabel Glyce yana yangi fitnalarni boshlaydi va ular to'qnashuv sari yo'l oladi.

«Doktor Kim»ning kelajagi esa hanuz noaniq bo'lib qolmoqda. BBC serialni tanlov asosida boshqa ishlab chiqaruvchilarga taklif qilgani ma'lum bo'lgan edi. Shu bilan birga, Line of Duty yaratuvchisi Jed Mercurio o'zining Hat Trick Mercurio kompaniyasi orqali loyiha boshqaruvini qo'lga olishi ehtimoli yuqori ekani aytilmoqda. Russell T. Daviesning so'zlariga ko'ra, huquqlar bo'yicha qaror yaqin kunlarda chiqishi kerak.

Davies yana yangi Doktor va yangi hamroh ishtirokidagi ishlab chiqarish ishlari kelasi yil yozida boshlanishi mumkinligini bildirgan. Serialning qaytishi uchun 2028 yoki 2029 yil ko'zlanmoqda. So'nggi fasl esa Disney+ platformasida taqdim etilgan.

Treyler

Manba: Collider